Gedicht von Käthe Herrmann
Lochen – Hörnle – Tieringen
Manchmol glotzt ma nei en PC Ond denkt; des wär jetzt wonderschö, wenn ma au amol wandere tät et per Mausklick em Internet, sondern richtig laufe mit Stock ond Huat do wär dr Lochen ond s’Hörnle guat.
Dr Wilhelm kennt sämtliche Weg ond Strecke, er stammt von Tierenge, dem Locheflecke, drom führt er 18 Schäfle aus ma trifft sich am zehne beim Bürgerhaus.
Em Konvoi fährt ma den Albbuckel nuff, s’Wetter ischt et ganz so guat druff trotzdem lost sich wege a paar Wölkle d’Stimmung et verderbe dem Völkle.
Beim Locheparkplatz ischt ma bald, jetzt wird gwanderet durch den Wald, a paar Wehleidige geits au die kennet s’jommere oifach et lau, se häbes em Kreuz oder am Knui des hoißt usse hui enne pfui die wellet ihre Kräfte spare no lot mas halt uffs Hörnle fahre.
Ond no wanderet ma wonderbar, d’Luft ischt frisch ond lau ond klar, dr Frühleng der ischt nemme weit em Gebüsch der Buchfenk schreit, Bardengle uff de Wiese dennt haufeweis scho sprieße, ond d’Anemone; was für a Pracht hent an weiße Waldbode gmacht.
Ma schwätzt nebeher über des ond sell, ond vergißt den PC dohoim ganz schnell, ond no send älle am Hörnle dobe, den Wilhelm muaß ma ganz arg lobe, ma erfährt aus erster Hand vom Radfahrersturz über d’Hörnleswand, bald woißt ma alles über Berg ond Tal ond d’Aussicht ischt phänomenal.
Zom Wandern ghört s’eikehre au drzua, drwege strebt ma dr Berghütte zua, di ischt s’sattwerde ganz gwiß et schwer s’kommt alles uff am Britt drher.
Noch dere feudale Schlemmerpause zeigt ons dr Wilhelm sei Kendheitszuhause, dui gschmackvolle Kirch, de Schöscht em Ländle ma kriegt sogar no a Orgelständle, au Tierenge hot Originale
mit woicher ond mit rauher Schale.
Dabie send au a paar Fraue, die wellet ebbes ganz anders aschaue, a wahrer Geheimtip, a Blumelade a Bsuach dort duat gwiß et schade, den halbe Lade kauft ma aus für’n Enkel David an Geburtstagsstrauß.
Zom Schluß send älle ganz Happy gwea, ma hot wieder a Stuck Albgegend gsea, ma fährt hoim, s’war wonderschö ond macht dui Wanderung nomol am PC 🙂
